Yangibozor tumanida 30 yoshgacha bo‘lgan yoshlar 48882 nafar (ayollar 23938 nafar, erkaklar 24944 nafar)ni tashkil qiladi. Ijtimoiy-iqtisodiy shart-sharoitlariga ko‘ra, 15522 nafar yoshlar yashil, 9521 nafari sariq, 361 nafari qizil toifaga kiritilgan.
Bugun  Yangibozor tumani markazidagi “Istirohat bog‘i”da tashkil qilingan  “Xorazm yoshlari o‘quv-seminari” dasturi doirasida tumandagi 30 yoshgacha bo‘lgan yoshlarning tibbiy profilaktik va ijtimoiy holatini o‘rganish, ularda aniqlangan kasalliklarni erta bosqichlarda davolash va sog‘lomlashtirish maqsadida Xorazm viloyati Sog‘liqni saqlash boshqarmasi tomonidan  ixtisoslashtirilgan ilmiy-amaliy tibbiyot markazlari tor mutaxassislari hamda tuman tibbiyot birlashmasi shifokorlari ishtirokida chuqurlashtirilgan tibbiy ko‘riklar tashkil qilindi.

Tadbir davomida   926 nafar yoshlar tibbiy ko‘rik bilan qamrab olindi.
Antropometriya tadbirlari, laborator tahlillar, EKG, UTT tekshiruvlari va mutaxassislar ko‘riklari asosida, 12 nafar yoshlarga statsionar muolaja uchun yo‘llanma berildi.
101 nafariga ambulator sharoitda davolanish tavsiya qilinib, zarur dori-darmon bilan bepul taʼminlandi.

Albatta, tibbiy ko‘rik bo‘lishini eshitib kelgan kattalar sog‘lig‘i ham eʼtibordan chetda qolmadi.
Tadbirga jalb qilingan mobil mammografda 45- 65 yoshli ayollar skrining tekshiruvlardan o‘tkazildi.
“Mobil donorlik kompleksi”ga donorlik qilish maqsadida murojaat qilgan sog‘lom yoshlar qon  topshirdilar.
“Mobil oftalmologik poliklinika” da esa 44 nafar fuqaro ko‘rikdan o‘tkazilib, ularning 23 nafarida  ko‘z kasalliklari aniqlandi va zarur muolajalar tavsiya qilindi.

Tadbir davomida sog‘lom turmush tarzi keng targ‘ib qilindi. Issiq ob-havo sharoitida to‘g‘ri ovqatlanish, oftob urishidan saqlanish, gigiyena qoidalariga rioya qilish bo‘yicha zarur tavsiyalar berildi. Salomatlik stollari tashkil etildi. Targ‘ibot materiallari tarqatildi.