O‘zbekiston Respublikasi Sog‘liqni saqlash vazirligi ko‘rsatmasi asosida RIO va BIATM Xorazm filialida viloyatimiz patronaj doyalari uchun seminar tashkil qilindi. 

Seminarda filial direktori Salomat Matyoqubova, viloyat sog‘liqni saqlash boshqarmasi bosh hamshirasi Bikajon Matchanova, viloyat lider doyasi Dilnoza Tohirova, Respublika o‘rta tibbiyot va dorishunos xodimlar malakasini oshirish va ularni ixtisoslashtirish markazi Urganch filiali o‘qituvchisi Tursunoy Polvanova so‘zga chiqib, bugungi kunda patronaj doyalar oldida turgan vazifalar, erishilayotgan yutuqlar, mahallalarda “Sog‘lom oila xonasi” ish faoliyatini samarali tashkil qilishning ahamiyati to‘g‘risida to‘xtaldilar.

RIO va BIATM Xorazm filiali neonotolog vrachi G. Jabborova  ona suti bilan oziqlantirishni qo‘llab-quvvatlash, homilador ayollar, go‘daklar, kichik yoshdagi bolalar hamda yosh onalarining to‘g‘ri ovqatlanishini targ‘ib va tashkil qilish bo‘yicha maʼruza qildi. Mavzuga doir slayd va videoroliklar namoyish qilindi. Lider doyalar o‘z tajribalari bilan o‘rtoqlashdilar.

Urganch shahar tibbiyot birlashmasi boshlig‘i Odilbek Matkarimov doyalar soati va qurbon hayiti aksiyasida faol ishtirok qilgan shahar patronaj doyalarini tashakkurnoma va qimmatbaho sovg‘alar bilan taqdirladi.

Seminar savol-javob va bahs-munozaralarga boy bo‘ldi.