Bugun Respublika o‘rta tibbiyot va farmatsevtika xodimlari malakasini oshirish va ularni ixtisoslashtirish markazi Urganch filialida «Tazyiq va zo‘ravonlikka uchragan homiladorlar va tug‘ish yoshidagi ayollarni olib borish algoritmi» mavzuida o‘quv seminari tashkil etildi.

Unda Xorazm viloyati Sog‘liqni saqlash boshqarmasi masʼullari, viloyat Oila va xotin-qizlar boshqarmasining mutaxassislari, tegishli tashkilotlar vakillari, shuningdek, barcha tuman, shaharlarda faoliyat ko‘rsatib kelayotgan patronaj doyalar ishtirok etdi.

O‘quv seminarining ochilishida viloyat Sog‘liqni saqlash boshqarmasi boshlig‘ining onalik va bolalikni muhofaza qilish bo‘yicha o‘rinbosari Gulibika Allaberganova, Xorazm viloyati Oila va xotin-qizlar boshqarmasi masʼul xodimi Muqaddas Masharipova so‘zga chiqib, mahalla xotin-qizlar faollari hamda patronaj doyalar faoliyatidagi hamkorlikni yana-da mustahkamlash, tazyiq va zo‘ravonlikdan jabr ko‘rib kelayotgan homiladorlar hamda tug‘ish yoshidagi ayollarga tibbiy, psixologik, va barcha amaliy yordamlarni ko‘rsatish, bu kabi nohush holatlarning oldini olish hamda bartaraf etish bo‘yicha bir qator ko‘rsatmalar berdilar.

Shuningdek, seminarda Respublika o‘rta tibbiyot va farmatsevtika xodimlari malakasini oshirish va ularni ixtisoslashtirish markazi Urganch filiali direktori Muyassar Jumaniyozova ishtirok etib, o‘tgan to‘rt oy davomida patronaj doyalar ishtirokida 144 soatlik malaka oshirish darslari olib borilganligi, buning natijasida doyalarning nazariy, amaliy bilim va ko‘nikmalari yana-da  mustahkamlanib, o‘tkazilayotgan o‘quvlarning samaradorligi ortib borayotgani xususida so‘z yuritdi.

Patronaj hamshiralar ishtirokida bo‘lib o‘tgan o‘quv seminari davomida mavzu yuzasidan atroflicha fikr-mulohazalar almashildi. Seminar yakunida tegishli tashkilotlar hamkorligida «Sog‘lom oila» xonalari ish-faoliyatini to‘g‘ri tashkil etish bo‘yicha patronaj doyalarga muhim tavsiyalar berildi.