Bugun Xiva shahar tibbiyot birlashmasida O‘zbekiston hamshiralar Assotsiatsiyasi Xorazm viloyat bo‘linmasi tomonidan «Sog‘lom turmush tarzi — yaxshi xayot maqsadi»  Davlat grant loyihasi doirasida hamshiralar va aholi vakillari ishtirokida suhbatlar tashkil etildi. Unda aholi o‘rtasida sog‘lom turmush tarzini shakllantirish, kasalliklarni erta aniqlash, aholining sanitariya-epidemiologik osoyishtaligi va salomatligini saqlash, qulay ekologik muhitni yaratish, insonlarning mehnat, yashash hamda dam olish sharoitlarini yaxshilash, salomatligiga salbiy taʼsir ko‘rsatuvchi salbiy odatlarni bartaraf etish kabi bir qator masalalarga alohida eʼtibor qaratildi.

Unda hamshiralar va aholiga birlamchi profilaktika bo‘yicha emlash, maqsadli skrining va tibbiy ko‘riklardan o‘z  vaqtida  o‘tish lozimligi, sport bilan muntazam shug‘ullanish hamda badantarbiya mashg‘ulotlarini kundalik turmush tarziga aylantirish, shaxsiy gigiyena qoidalariga rioya qilish, sog‘lom va to‘g‘ri ovqatlanish, ortiqcha vazn va semizlikni bartaraf etish, zararli odatlarga qarshi kurashish, inson salomatligi, aholining tibbiy madaniyatini oshirish mavzularida tushuntirish ishlari olib borildi.

Shuningdek, ikkilamchi profilaktika doirasida maʼlum sharoitlarda immun holatining kamayishi, o‘ta zo‘riqish, adaptiv yetishmovchiliklar sabab yuzaga keladigan kasalliklarning oldini olish, avj olib ketishi yoki qaytalanishiga olib kelishi mumkin bo‘lgan xavf omillarini bartaraf etish bo‘yicha zarur tavsiyalar berildi.

Suhbatlar davomida turli bukletlarni tarqatish orqali sog‘lom turmush tarzini keng targ‘ib etishga alohida urg‘u berildi. Mavzu yuzasidan bildirilgan barcha savollarga mutaxassislar tomonidan batafsil javoblar qaytarildi.