Xorazm viloyati sog‘liqni saqlash boshqarmasi boshlig‘i Ko‘palboy Tangriberdiyev ishtirokida tizimdagi davolash profilaktika muassasalari rahbarlari, kasaba uyushma qo‘mitalari raislari bilan ochiq muloqot tashkil qilindi.

Ochiq muloqotda viloyat sog‘liqni saqlash boshqarmasi boshlig‘i Ko‘palboy Tangriberdiyev, O‘zbekiston kasaba uyushmalari Federatsiyasi Xorazm viloyati kengashi raisi Gulsara Qurbonboyeva, Sog‘liqni saqlash xodimlari kasaba uyushmasi respublika kengashi raisi Farhod Hanapiyayev, viloyat kengashi raisi Ravshan Sheniyazov so‘zga chiqib, sog‘liqni saqlash tizimida amalga oshirilayotgan islohotlar, soha xodimlarining ijtimoiy-iqtisodiy himoyasini kuchaytirish, munosib mehnat sharoitlari yaratish, sog‘lomlashtirish borasida olib borilayotgan chora-tadbirlar haqida to‘xtaldilar.

Viloyat sog‘liqni saqlash boshqarmasi boshlig‘i ushbu islohotlar samaradorligini taʼminlashda korrupsiya va taʼmagirlikning oldini olishning ahamiyatiga alohida eʼtibor qaratdi.

Bu tibbiy xizmatlarning samaradorligiga, fuqarolarning yuqori sifatli yordam olishiga, shuningdek, davlatning iqtisodiy barqarorligiga taʼsir ko‘rsatadi. Masalan, tibbiyot mutaxassislari standartlarga rioya qilish o‘rniga, ayrim bemorlarga ustunlik berish uchun pora olishlari mumkin. Bu bemorlarga yetarli darajada tibbiy yordam ko‘rsatilmasligiga yoki standartlarga javob bermaydigan dori-darmonlarni qabul qilishiga olib keladi. Bu o‘z-o‘zidan aholi salomatligining yomonlashishi va kasallanishning oshishiga sabab bo‘ladi.

Boshqarma boshlig‘i sohada korrupsiyaning oldini olish maqsadida faoliyat shaffofligi taʼminlanayotganligi, elektron tizim keng joriy qilinayotganligi, ishonch telefonlari faoliyati yo‘lga qo‘yilganligi, xodimlar mehnatini munosib rag‘batlantirish choralari ko‘rilayotganligini qayd qildi. Muassasa rahbarlarini korrupsiyaning oldini olishga qaratilgan tadbirlarni yana-da kuchaytirishga undadi.