O‘zbekiston Respublikasi Prezidentining 2021 yil 18 sentyabrdagi PQ-5246-son qaroriga asosan, O‘zbekiston Respublikasi Iqtisodiyot va moliya vazirligi huzurida Islom taraqqiyot banki va OPEK xalqaro taraqqiyot jamg‘armasi moliyaviy ko‘magi asosida ko‘makchi hamkor Birlashgan Millatlar Tashkiloti Taraqqiyot Dasturi ishtirokida “Qishloq joylarni barqaror rivojlantirish” loyihasi amalga oshirilmoqda.

Loyiha doirasida Bog‘ot tumanidagi O‘zgarish mahallasining “O‘zgarish” oilaviy shifokorlik punktiga maʼmuriy va tibbiy ishlar uchun 2 ta kompyuter, bemorlar haqidagi maʼlumotlarni kiritish, patronaj ko‘riklari, teletibbiyot va tibbiy yozuvlarni ko‘rish uchun 3 ta planshet, maʼlumotlarni samarali hujjatlashtirish uchun 1 ta printer, elektr taʼminoti uzilgan holatlarda foydalanish uchun 2 ta uzluksiz quvvat manbai taqdim etildi.

Yangi uskunalar va raqamli tizimlardan muvaffaqiyatli foydalanish uchun tibbiyot xodimlari ishtirokida trening tashkil qilindi.

Tadbirda viloyat sog‘liqni saqlash boshqarmasi boshlig‘i o‘rinbosari Jumanazar Qurbonov ishtirok etdi va hamkorlarga minnatdorchilik bildirdi. Oilaviy shifokorlik punkti jamoasiga tibbiy xizmat sifatini yaxshilash, aholiga qulayliklar yaratish bo‘yicha zarur topshiriqlar berdi.

Ushbu loyihadan ko‘zlangan maqsad kishloq tibbiyot punktlarini zamonaviy texnologiyalar bilan jihozlash va tibbiyot xodimlarini o‘qitish orqali chekka hududlarda tibbiy xizmatlar sifatini sezilarli darajada oshirishdir. Milliy raqamli sog‘liqni saqlash tizimi bilan integratsiya yana-da samarali maʼlumotlar almashish va resurslarni boshqarish imkonini beradi, natijada qishloq aholisi salomatligini yaxshilashga olib keladi.