Do‘schanov Baxtiyor Allaberganovich
O‘zbekiston tibbiyot sohasining yirik vakillaridan biri, taniqli olim, tibbiyot fanlari doktori, professor Do‘schanov Baxtiyor Allaberganovich 2025 yil 9 fevral kuni 75 yoshida olamdan o‘tdi.
Baxtiyor Do‘schanov 1950 yil 11 noyabrda Urganch shahrida ziyolilar oilasida tug‘ilgan. 1974 yilda Toshkent Davlat tibbiyot institutining “Sanitariya gigiyena” fakultetini tamomlab, Xorazm viloyati sanitariya va epidemiologiya stansiyasining ovqatlanish gigiyenasi bo‘limida sanitar vrach lavozimida ish boshlagan.
B.Do‘schanov 1976 yilda viloyat Sanitariya epidemiologiya stansiyasida bo‘lim boshlig‘i, 1977 yilda Urganch shahar Sanitariya epidemiologiya bosh vrach va 1984 yilda Xorazm viloyat bosh sanitariya vrachi lavozimlariga tayinlandi. 1995-1998 yillarda viloyat sog‘liqni saqlash boshqarmasi boshlig‘i lavozimida faoliyat ko‘rsatdi.
1998- 2006 yillarda Toshkent tibbiyot akademiyasi Urganch filialiga direktorlik qildi.
Keyingi yillarda B.Duschanov TTA Urganch filiali “Umumiy gigiyena” kafedrasida professor lavozimida faoliyat ko‘rsatgan.
Baxtiyor Allaberganovich o‘z umrini tibbiyot, sog‘liqni saqlash va ilm-fan taraqqiyotiga bag‘ishlagan inson edi. Uning tibbiyot va gigiyena sohasida olib borgan ilmiy tadqiqotlari aholi salomatligini yaxshilash, tibbiy profilaktika choralarini takomillashtirish va ekologiya bilan bog‘liq kasalliklarning oldini olish borasida ulkan ahamiyat kasb etgan. Olimning “Xorazm taomlari”, “Shifobaxsh taomlar va sharbatlar”, “Avesto va tibbiyot” kabi ilmiy asarlari nafaqat milliy tibbiyotimiz, balki xalqaro tibbiyot sohasida ham munosib o‘ringa ega. B.A.Do‘schanov 520 tadan ortiq ilmiy maqolalar, monografiyalar, o‘quv-uslubiy qo‘llanmalar muallifi. Ilmiy ishlari Fransiya, Daniya, Rossiya, Ukraina, Moldaviya va respublikaning markaziy nashrlarida eʼlon qilindi.
Professor nafaqat ilm-fan rivojiga, balki yuqori malakali tibbiyot kadrlarini tayyorlashga ham katta hissa qo‘shgan. U kishining rahbarligida 15 dan ortiq fan nomzodlari, 7 ta fan doktori yetishib chiqqan, o‘nlab ilmiy ishlarga rahbarlik qilgan. Tibbiyot oliygohlari va kollejlari uchun darsliklar yozgan, xalqaro ilmiy anjumanlarda faol ishtirok etgan, TTA Urganch filialida rahbarlik qilgan yillarida Fransiya, Daniya, Koreya, Rossiya va Ukraina kabi davlatlar bilan samarali hamkorliklar o‘rnatgan.
Baxtiyor Allaberganovich 1984 yilda “O‘zbekiston Respublikasi Sog‘liqni saqlash aʼlochisi” ko‘krak nishoni, 1986 yilda “Hurmat belgisi” ordeni va 2002 yilda Ukraina xalqaro akademiyasining “Zolotaya Fortuna” mukofoti bilan taqdirlangan.
Fidoyi ustoz, jonkuyar rahbar va yetuk olim sifatida Do‘schanov Baxtiyor Allaberganovichning xotirasi shogirdlari, hamkasblari va soha mutaxassislari qalbida abadiy saqlanadi.
Xorazm viloyati sog‘liqni saqlash boshqarmasi,
O‘zbekiston vrachlar assotsiatsiyasi Xorazm viloyat bo‘limi,
TTA Urganch filiali jamoasi