Viloyat sog‘liqni saqlash boshqarmasi hamda RIOvaRIATM Xorazm filiali tomonidan O‘zbekicton Respublikasi Prezidentining 2024 yil 22 noyabrdagi Ayollar orasida onkologik kasalliklarni nazorat qilish tizimini takomillashtirish chora-tadbirlari to‘g‘risida”gi PQ-402-sonli qarori ijrosi yuzasidan Bog‘ot va Hazorasp tumanlarida amalga oshirilayotgan ishlar tahlil qilindi.

Tahlil natijalari asosida o‘tkazilgan yig‘ilishda Xorazm viloyat sog‘liqni saqlash boshqarmasi boshlig‘ining onalik va bolalik bo‘yicha o‘rinbosari Gulbika Allaberganova, RIOvaRIATM Xorazm filiali direktori Otaxon Tojiddinov, filial mammolog vrachi Z. Qazaqova va onkoxirurgi A. Saparbayev ishtirok qilib, Prezident qarorining ahamiyati, uning ijrosini taʼminlash orqali ayollar salomatligini muhofaza qilish kuchaytirilishi haqida gapirdilar.

Yig‘ilishda tuman hokimi o‘rinbosari, mahalla fuqarolar yig‘ini raislari, «mahalla yettiligi», xotin — qizlar faollari, nuroniy otaxon va onaxonlar, tuman onkologi va “onkonazorat xonasi” ginekolog vrachi, tuman oilaviy poliklinika mudirlari, umumiy amaliyot shifokorlari va boshqalar ishtirok etdi.

Tadbirda viloyatda o‘tkazilayotgan onkoskrining tekshiruv natijalari, ayollar va ularning oila aʼzolari orasida onkologik kasalliklarning oldini olish, ularni erta aniqlash, davolash hamda oqibatlari haqida keng tushuntirish berildi.

Mahalla faollarining va fuqarolarining savollariga javob qaytarildi, kerakli tavsiyalar berildi.

Shuningdek, onkoogohlik, sog‘lom turmush tarzi va boshqa bir qator masalalar bo‘yicha seminar tashkil etilib, ko‘rgazmali maʼruza qilindi.